காரல் மார்க்ஸ் என்றழைக்கப்படும் காரல் ஹென்ரிச் மார்க்ஸ் (மே 5, 1818, ஜெர்மனி - மார்ச் 14, 1883, லண்டன்) ஜெர்மானிய மெய்யியலாளர்களுள் ஒருவராவார். அறிவியல் சார்ந்த பொதுவுடைமையை வகுத்தவருள் முதன்மையானவர். மெய்யியலாளராக மட்டுமல்லாது அரசியல் - பொருளாதார மற்றும் வரலாற்றியல் வல்லுனராக, தலைசிறந்த ஆய்வறிஞராக, எழுத்தாளராக, சிந்தனையாளராக, புரட்சியாளராகக் காரல் மார்க்ஸ் அறியப்படுகிறார். பல்வேறு துறைகளிலும் ஏராளமான விவகாரங்கள் பற்றிய ஆய்வுகளையும், கருத்துக்களையும் இவர் வெளியிட்டுள்ளார் என்றாலும் இவரது ஆய்வுகளும், கருத்துக்களும் பொருளாதார ஏற்றத்தாழ்வுகளின் அடிப்படையில் வரலாற்றை ஆய்வதாகவே அமைந்தது. பொதுவுடைமைக் கொள்கைகளின் முக்கியமான ஒருவராக காரல் மார்கஸ் கருதப்படுகிறார். மற்றவர் இவரது நண்பர் பிரெட்ரிக் ஏங்கல்ஸ் ஆவார்..